ವರ್ಷಧಾರೆ.

ವರ್ಷದ ಹರ್ಷದ ಮೊದಲ ವರ್ಷಧಾರೆ,
ದಾರೆಯಾಗುತ್ತಿದೆ ಧರೆಯೊಳಗೆ.
ಮುಗಿಲೆಲ್ಲ ಕಪ್ಪಾಗಿ, ಕಪ್ಪೆಲ್ಲ
ಕರಗಿರೆ,
ತಂಪಾಗಿ, ಸೊಂಪಾಗಿ,  ಸುರಿಯುತಿದೆ ಹನಿಯಾಗಿ.

ಕಾದು, ಕಾಯ್ದುಕುಳಿತ ಧರೆಗೆ.
ಬಾನಿನ ಹನಿ -ಹನಿಮಾತು ಇಂಪಾಗಿ,
ಮುಗಿಲ ಹನಿಗಳ ಮಾತಿಗೆ.
ಸ್ವರದಿ, ನುಡಿಯುತಿಹಳು  'ಅವನಿ'
ರಾಗವಾಗಿ.

ಇಳೆಯ  ಕಂಗಳು ಮಳೆಗೆ, 
ಮುತ್ತಾಗಿ, ಹೊಳೆಯುತಿದೆ.
ಹೊಳೆವ ಹನಿ ನೀರಾಗೆ,
ಇಳೆ ನಾಚಿ, ನೀರಾಗುತಿದೆ.

ಆಗಸದ ಆಸೆಯಹನಿ, ಇಳೆಮೆತ್ತಿ.
ಇಳೆ ಹೆಣ್ಣಾಗಿ, ಮಳೆ ಮುತ್ತಿ.
ಇಳೆ-ಮಳೆಗಳೊಂದಾಗಿ ಸುತ್ತಿ.
ಹರಿಯುತ್ತಿರೆ ಜಗನಗುತಿದೆ,  ಮುಖಎತ್ತಿ.

ಅಂಬರೀಷ ಎಸ್. ಪೂಜಾರಿ.